Еркін күрестен Азия ойындарының қола жүлдегері Ермек Байдуашев министрліктің ресейлік балуандармен белдесіп, жеңгендер ғана Бейжің Олимпиадасына барады деп шығарған шешімін еске алды. Бұл туралы ол Aqyrys Seitqazy YouTube арнасында сөз етті, деп жазады Sportbugin.kz.
Ермек Байдуашевтің айтуынша, ол кезде құраманың бас бапкері Мәлік Нәдірбекұлы болған. Ол Нұржан Қатаев пен Таймураз Тигиевтің төбелесінен кейін министрмен кездесіп, ұрыс естіп шыққанын айтқан.
» Ол кезде министрлер адамның аты түгілі, фамилияңды, түріңді білмейтін. Темірхан Досмұхамбетовке кіріп шыққан ағайымыз: «Ұрысты. Сендердің бәріңді Ресейдегі турнирге апарып «прикидка» жасат деп тапсырма берді» деді.
«Біз Ресейге барып, Қазақстанның проблемасын неге шешеміз» деп едім: «Қызық емес, барасыңдар» деді.
Содан ойлана келе: «Өмірдің мәселесі Олимпиадамен шешілмейді. Бұйырса, Олимпиада қайта келеді. Мен орыстарға барып, қазақтардың проблемасын шешпеймін» деп ол жаққа барудан бас тарттым, – дейді Ермек Байдуашев.
Балуанның сөзінше, бұған дейін ол Қазақстан чемпионатының финалынан өтіп, қарсыласының бәрін жеңген.
«Төбелестен бір күн бұрын, Қазақстан чемпионатының финалында Генадий Лалиевті ұттым. Үш легионер болды, үшеуін де жеңдім. Чемпион атандым. Оған елім де, жерім де, ата-анам да қуанды. Төрт ай бұрын оларға жарысты ұтсам Олимпиадаға баратынымды айтқанмын. Өйткені, чемпионатты кім ұтады, Олимпиадаға сол барады деп айтылған. Содан мен, Ақжүрек Таңатаров, Қатаев баратыны шешіліп отырған, – деді ол.
Ермек Байдуашев бұл жағдайдың Бейжің Олимпиадасы қарсаңында, бір жыл бұрын болғанын еске алды.