Швейцарияның Цюрих қаласында World Athletics ұйымдастыруымен жеңіл атлетикадан «Гауһар лигасының» финалдық кезеңі өтті, деп хабарлайды Қазақстан жеңіл атлетика федерациясының баспасөз қызметі.
Беделді турнирдің финалдық кезеңінде Қазақстан атынан Нора Джеруто мен Дейзи Джемпекей бақ сынады. 3000 метрге кедергілер арқылы жүгіруден сынға түскен Нора Джеруто турнирдің күміс жүлдегері атанды.
Ол аталған қашықтықты 9.10,87 уақыт көрсеткішінде жүгіріп өткен. Бұл бәсекеде кениялық Фейт Черотич (8.57,24) жеңіске жетсе, тунистік Марва Бузаяни (9.12,03) үздік үштікті тұйықтады.
Ал тағы бір спортшымыз Дейзи Джемпекей 9.15,98 нәтижесімен жарысты алтыншы орында аяқтады.
«Гауһар лигасы» 2010 жылдан бері өткізіліп келеді және биылғы маусымда бұл бәсеке 16-рет ұйымдастырылды.