Бокстан әлем және Азия чемпионы Бекзад Нұрдәулетов ұлттық құраманың бас бапкерлеріне қатысты өз ойын айтты. Бұл туралы журналист Ақырыс Сейтқазының YouTube арнасына сілтеме жасаған Sportbugin.kz хабарлайды.
«Қайрат Сәтжанов ағайымызбен жасөспірімдер командасында да жаттықтым. Екі жылдай. Қайрат ағай сол кезден бастап бүгінге дейін физикалық дайындыққа ерекше көңіл бөледі. Ол кісі жастар мен жасөспірімдер командасын қандай жарысқа апарса да, жалпы командалық есепте бірінші орын алатын. Физикалық тұрғыдағы дайындыққа қатты мән беретін адам. Мәселен, қазір біздің боксшылар үшінші раундта шаршап қалады деген сөз бар. Бүгінде Қайрат ағайымыз осы олқылықты жоюға күш салуда. Физикалық дайындыққа 2-3 сағат арнайтын кездеріміз бар.
Ал Мырза ағайға келер болсақ, оның жаттығу процесі әлдеқашан бір жүйеге түскен. Спортшыға берілетін қиындықты қай кезде көтеру керек, қай кезде түсіру керек, бәрі жүйеленген. Жігіттердің бабына қарап, жаттығуды біріне аз, біріне көп береді. Былай айтқанда, Мырзағали ағайдың тәжірибесі көрініп тұрады. Ол спортшыға бір қарап тұрып: «Салмағың осындай» деп айтып береді. Таң қаламыз. Тактика қойғанда да өте байсалды қалыппен айтып, рух береді.
Ғалымбек Кенжебаев ағайымызда жоғарыдағы екі бапкерде бар қасиеттің бәрі бар. Ол физикалық дайындыққа да, тактикаға да көңіл бөледі. Бірақ Ғалымбек ағайдың тұсында команда психологиялық тұрғыдан нашарлау болды. Бұл — менің өз ойым. Дайындық барысында физика мен техниканы қатар алып жүреді, бірақ жігіттер психологиялық жағынан тұрақсыз болды», — дейді Нұрдәулетов.
Бекзад Нұрдәулетов 4 қыркүйек күні Англияның Ливерпуль қаласында басталатын бокстан әлем чемпионатында бақ сынайды.