Кәсіби боксшы Айдар Шәрібаев Ливерпульдегі әлем чемпионатында кейбір жекпе-жектердің күмән қалдырғанын айтты. Сондықтан, ол төрешілермен жұмыс істеп, боксшыларымыздың әділ жеңісін басқаға бермеу мәселесін көтерді. Бұл туралы ол журналист Ақырыс Сейтқазының YouTube арнасында айтты, деп жазады Sportbugin.kz.
«Боксты Олимпиададан алып тастаймыз деген әңгіме не үшін жылда айтылады? Өйткені, базар болып кетті. Кейбір жекпе-жектер «сен қанша бересің?» деген әңгімемен шешілген сияқты. Сол үшін тізгінді тең тарту керек.
«Сүйреген ит аңға жарамайды» дейді. Сүйрегенге жүріп тұратындай боксшыларды дайындауымыз керек. Бірақ, сүйреу жағында да кем қалдырмауымыз керек. Өзбекті сүйреп жатқанда, біз неге сүйремейміз? Олар берген нәрсені біз бере алмаймыз ба?
Бізге біреудің жеңісін тартып әперудің қажеті жоқ. Бірақ бізге әділетсіздік істемеуі үшін, біз сақтануымыз керек. Қаншама спортшының жылдап төккен терін басшылық жіберіп алмауы керек», — деді Айдар Шәрібаев.
Фото: Сали Сабиров
About the Author
