Астанада өтіп жатқан дзюдодан Grand Slam турнирінің 81 келі салмақтағы чемпионы Жалғас Қайролла Sports24.kz тілшісіне берген сұхбатында жарыстағы жолы мен жеңістен кейінгі әсерімен бөлісті, деп хабарлайды Sportbugin.kz.
«Бұл турнирге мен екі жылдан астам уақыт дайындалдым. Қазір бізде жаңа жүйе — жаңа бапкерлер келген соң, мүлдем басқа бағдарлама бойынша жаттықтық. Бүгін өзімнің нағыз бабымда күрестім деп ойлаймын. Бұл күн мен үшін өте ерекше. Бұл жеңісті қазақ халқына арнаймын. Эмоциямды сөзбен жеткізу мүмкін емес. Бірінші белдесуден бастап көрермендердің толық қолдауын сезіндім және жанкүйерлер сенімін ақтадым деп үміттенемін. Алғашқы кездесу өте ауыр болды, сол кезде өз шеберлігімді толық көрсете алмадым.
81 келіге дейінгі салмақтағы бәсекелестік қазір Қазақстанда ең мықты деп ойлаймын. Сондай-ақ ұлттық құраманың бапкерлеріне алғыс айтқым келеді, өйткені мені алғашында резервтік спортшы ретінде қарастырды. Менің орныма Алмат Әділет пен Абылайхан Жұбаназар бару керек еді, бірақ Азия чемпионатынан кейін мүмкіндік маған бұйырды», — деді Қайролла.
Айта кетейік, отандасымыз турнир барысында Қырғызстан спортшысы Ратбек Жұманазаровты жарыс жолынан шығарып, кейін Тәжікстан балуаны Бехрузи Хожазодадан басым түсті. Ширек финалда молдовалық Виктор Стерпуды ұтып, жартылай финалда қазақстандық Досхан Жолжақсыновтан айласын асырды. Ал шешуші белдесуде тағы бір Молдова өкілі Петру Пеливанды жеңіп, алтын медальға қол жеткізді.
About the Author
