Астанада өткен Grand Slam додасында татамиге оралған Елдос Сметов өзінің спорттық мансабына қатысты пікір білдіріп, кәсіби жолын аяқтамағанын мәлімдеді, деп жазады Sportbugin.kz.
«Мен мансабымды аяқтаған жоқпын. Париж Олимпиадасынан кейін біраз уақыт жарақаттармен күресіп, қалыпқа келу кезеңінен өттім. Қазір жағдайым жақсы, біртіндеп бабыма келе жатырмын. Бүгін Астанада өткен Grand Slam аясында қазақ халқына Олимпиада чемпионына арналған алтын тігілмені көрсетуді жөн көрдік. Бұл — тарихи тігілме. Бұған дейін Қазақстан құрамасында ешкім мұндай белгі таққан емес. Сондықтан оны ең алдымен өз жанкүйерлеріміз көрсін деп шештік. Бүгін өзіммен бірге баламды алып шықтым. Әке ретінде оған мақсат қоя білуді, жауапкершілікті сезінуді үйретудегі алғашқы қадамымды жасадым деп ойлаймын. Болашақта үлкен үміт күтемін. Тек өз баламнан ғана емес, барша қазақ жастарының мықты болғанын қалаймыз. Өйткені біздің алдымызда Жақсылық Үшкемпіровтей аңыз тұлға өтті. Ол бізден бұрынғы буынға да, бізге де үлгі болды. Өкінішке қарай, бүгінде арамызда жоқ. Сондықтан да біз сол ағамыздың атына кір келтірмеу үшін кейінгі жастарға үлгі болуымыз керек деп ойлаймын.
Қазір алдағы жарыстарға дайындалып жатырмын. Бірақ жақын уақытта нақты қай турнирде күресетінім әзірге белгісіз. Өз деңгейіміздің қаншалықты дайын екенін толық бағамдап алуымыз қажет. Дегенмен Қытайдың Циндао қаласында өтетін Гран-при турнирінде белдесуім мүмкін. Нақты шешім кейінірек жарияланады.
Салмақ дәрежесін ауыстырмаймын. Алдағы уақытта да 60 келіде күресемін. Бірнеше ғана жарысқа қатысуымыз мүмкін, сондықтан рейтингтік ұпай көп берілетін ірі турнирлерде белдесу маңызды. Биыл басты додалар — Азия ойындары мен әлем чемпионаты. Қай жарысқа толық дайын болсам, сол жерде ел намысын қорғап, көк туды биікте желбіретуге бар күшімді саламын. Жас деген — жай ғана сан. Әлі де қолымнан келеді деп сенемін.
Қазақ спортының тарихында жаңа белеске жеттік. Енді әлем тарихында да өз ізімізді қалдыруға болады деп ойлаймын. Мүмкін емес нәрсе жоқ. Басты мақсатым — екі дүркін Олимпиада чемпионы болу. Сондай-ақ барлық жанкүйерге қолдауы үшін алғыс айтқым келеді. Әрқайсыңыздың қолдауларыңызды ерекше бағалаймын», — деді Елдос Сметов.
Айта кетейік, Елдос Сметов Grand Slam турнирінде ұлы Омармен бірге татамиге шығып, спорттағы ұрпақ сабақтастығының жарқын көрінісін көрсетті.
About the Author
