Таеквондодан Қырғызстан ұлттық құрамасы алаяқтық салдарынан Моңғолияда өтіп жатқан Азия чемпионатына уақытында аттана алмай қалды, деп хабарлайды Sportbugin.kz.
Бұл туралы Қырғызстан ITF таеквондо федерациясының вице-президенті Сардор Рахимшайхов мәлімдеді.
Оның айтуынша, ұлттық құрама бүгін жарысқа тіркеуден өтуі тиіс болған. Ал чемпионат ертең басталады. Алайда Алматы — Бейжің — Ұлан-Батыр бағытына алдын ала төлем жасалған әуе билеттері іс жүзінде сатып алынбағаны анықталып, спортшылар рейске жіберілмеген.
Федерация мәліметінше, әуе билеттерін рәсімдеуге 2 миллион сомнан астам қаражат аударылған.
«Бұл Азия чемпионатына жарты жылдан астам уақыт дайындалдық. Қазір турнирге қатысу мүмкіндігіміз өте аз болып тұр», — деді Сардор Рахимшайхов.
Осыған байланысты Қырғызста таеквандо федерациясы туроператорларға, әуе компанияларына және ел басшылығына көмек сұрап үндеу жасады.
Сондай-ақ Халықаралық және Азияның ITF таеквондо федерациялары Қырғызстан құрамасына тіркелу мерзімін ертеңге дейін ұзартуға дайын екенін мәлімдеген. Егер мәселе шұғыл шешілсе, қырғызстандық спортшылар құрлық біріншілігіне қатысу мүмкіндігін сақтап қалуы мүмкін.
About the Author
