Астананың Qazaqstan жеңіл атлетикалық манежінде грек-рим, еркін және әйелдер күресінен U17 және U20 жас арасындағы Қазақстан чемпионаты мәресіне жетті. Он күнге созылған додаға еліміздің барлық өңірінен 1 200-ден астам жас спортшы қатысып, бозкілемде өз шеберлігін сынады, деп жазады Sportbugin.kz.
Ел күресінің тарихында тұңғыш рет биылғы чемпионатта жүлдегерлерге сыйақылар тағайындалды. Күрес түрлерінен өткізілетін Қазақстан чемпионаттарында қаржылай жүлде қоры бұрын-соңды қарастырылмаған еді. Биыл бұл сома 60 миллион теңгені құрады.
Атап айтқанда, U17 санатында жеңімпаз 300 мың теңге иеленсе, күміс пен қола медаль иегерлері тиісінше 200 және 100 мың теңгеден алды.
Ал U20 санатының чемпионына 500 мың теңге, екінші орынға 300 мың, үшінші орынға 150 мың теңге табысталды. Бұл шешім жас спортшылармен қатар, өңірлердегі бапкерлер мен спорт мектептері үшін де маңызды қолдау болды.
Қазақстан күрес федерациясының бас хатшысы Дамир Бекбосыновтың айтуынша, биылғы қаржылай ынталандыру тек U17 және U20 санаттарымен шектелмейді. Федерация жас ерекшеліктеріне қарай өтетін барлық негізгі Қазақстан чемпионаттарының жүлдегерлерін жүйелі түрде қолдауды қолға алған.
– Қазақстан күрес федерациясының президенті Оқасов Еркін Қадырғалиұлының қолдауымен биылғы Қазақстан чемпионаттарына жалпы құны 200 миллион теңгені құрайтын қомақты жүлде қоры қарастырылып отыр. Мысалы, U15 жас санатының жеңімпазына 200 мың теңге, U17 санатында 300 мың, U20 мен U23 санаттарында 500 мың теңге, ал ересектер арасындағы Қазақстан чемпиондарына 1 миллион теңге беріледі. Бұл – спортшылар мен жаттықтырушылар үшін нақты қолдау. Осындай қолдаудың арқасында чемпионаттарымыздың деңгейі де арта түседі деп сенемін, – деді Дамир Әсенғазыұлы.
Жарыс қорытындысы өңірлік күрес мектептерінің деңгейін де айқын көрсетті. Грек-рим күресінен U17 санатында жалпыкомандалық есепте Алматы облысы 130 ұпаймен көш бастады. Абай облысы 105 ұпаймен екінші орынға тұрақтаса, Шымкент қаласы 93 ұпаймен үздік үштікті түйіндеді.
U20 санатында да Алматы облысының балуандары 131 ұпаймен бірінші орыннан көрінді. Шымкент қаласы 115 ұпаймен екінші, Ақтөбе облысы 104 ұпаймен үшінші орынға ие болды.
Әйелдер күресінде U17 санатында Алматы қаласының құрамасы 137 ұпаймен алға шықты. Түркістан облысы 108 ұпаймен екінші, Жетісу облысы 94 ұпаймен үшінші орынға жайғасты. U20 санатында Алматы қаласының спортшылары 177 ұпаймен топ бастады. Түркістан облысы 144 ұпаймен екінші, Алматы облысы 113 ұпаймен үшінші сатыға көтерілді.
Ал еркін күрестен U17 санатында Шымкент қаласы 128 ұпаймен жалпыкомандалық есепте бірінші орынға шықты. Абай облысы 119 ұпаймен екінші болса, Алматы қаласы 118 ұпаймен үшінші орынды иеленді. Ұпай айырмасының аз болуы өңірлер арасындағы бәсекенің тартысты өткенін көрсетті.
U20 санатында Алматы қаласы 177 ұпаймен көш бастаса, Түркістан 130, ал Алматы облысы 108 ұпайға қол жеткізді.
Сонымен қатар, чемпионатта спортшылардың күрес кезінде көрсеткен қайсар мінез бен шеберлік те Федерация тарапынан арнайы бағаланды. Мәселен, «Қайсар рух» аталымы бозкілемде табандылық танытып, соңына дейін беріспеген балуандарға табысталды. Бұл жүлдеге еркін күрестен сынға түскен Айбек Қалияхмет (79 келі, Алматы облысы), әйелдер күресінде чемпион атанған Динара Дауылқызы (53 келі, Астана қаласы) және грек-рим күресінде топ жарған Дияр Аманәлі (55 келі, Шымкент қаласы) ие болды.
Ал «Дара тәсіл» аталымы жоғары техникалық шеберлігімен көзге түскен спортшыларға берілді. Еркін күрес өкілі Әділет Манап (79 келі, Алматы облысы), грек-рим күресінің балуаны Еркебұлан Әнапия (82 келі, Алматы облысы) және әйелдер күресінің бұрымды балуаны Назым Мұрат (65 келі, Абай облысы) аталмыш номинацияның иегерлері атанды.
Сондай-ақ, чемпионаттың әділ өтуіне үлес қосқан төрешілер де марапатталды. Әйелдер күресінен Ксения Дробина, грек-рим күресінен Александр Грудин және еркін күрестен Талғат Мырзабек үздік төреші ретінде арнайы сыйақыға ие болды.
Қорыта айтқанда, он күнге созылған чемпионат медаль иелерін ғана емес, болашақтың бет-бейнесін де айқындады. Бозкілемге шыққан жас балуандардың техникалық шеберлігі мен қайсар мінезі олардың бәсекелі додаларға дайын екенін аңғартты. Бүгінгі ел чемпиондары ертең халықаралық аренада ел намысын абыроймен қорғайтын жаңа буын.
Қазақстан күрес федерациясының баспасөз қызметі.
About the Author
