Түркияның Анталия қаласында өткен Victory Cup халықаралық турнирінде Қазақстанның U17 және U20 жас санаттарындағы құрама командалары табысты өнер көрсетті. Жиырмаға жуық елден 800-ден астам спортшы қатысқан жарыста қазақстандық балуандар жалпы 12 алтын, 9 күміс және 16 қола медаль жеңіп алды, деп жазады Sportbugin.kz.
Алдымен бозкілемге шыққан U17 құрамасы күрестің үш түрі бойынша да жалпыкомандалық есепте топ жарды. Грек-рим күресінде отандастарымыз 3 алтын, 1 күміс және 8 қола медаль еншіледі. Жаңажол Қуанышбек (51 кг), Асқар Нұрали (60 кг) және Төлеш Марлен (65 кг) өз салмақтарында чемпион атанып, Қазақстан құрамасын бірінші орынға шығарды. Бұл бағдарламада Әзербайжан екінші, Түркия үшінші орын алды.
Еркін күресте де қазақстандықтар басымдығын сақтады. Бақдәулет Ағабек (48 кг), Темірлан Мұрат (55 кг) және Әділет Рысбай (71 кг) алтын жүлде иеленді. Жалпы есепте 3 алтын, 3 күміс, 4 қола медальмен Қазақстан құрамасы тағы да бірінші орынға тұрақтады.
Әйелдер күресінде Інжу Баққожа (46 кг) мен Бағжан Құрманбай (73 кг) чемпион атанды. Сондай-ақ қоржынға 5 күміс және 4 қола медаль түсті. Нәтижесінде бұл бағдарламада да қазақстандықтар жалпыкомандалық есепте көш бастады. Түркия екінші, Қырғызстан үшінші орынға ие болды.
U20 жас санатындағы балуандар да жүлдесіз қалған жоқ. Грек-рим күресінде Әмірмұхаммед Қабулов (55 кг) алтын медаль жеңіп алса, Алпамыс Болатұлы (60 кг) мен Еркебұлан Анапия (82 кг) күміс жүлдеге ие болды. Бұл бағдарламада Қазақстан құрамасы үшінші орынға тұрақтады.
Еркін күресте Асхаб Хаджиев (86 кг) чемпион атанып, Ерхан Әбіл (79 кг) мен Дінмұхаммед Қасымбек (86 кг) қола жүлде еншіледі. Жалпы есепте команда бесінші орын алды.
Ал әйелдер арасында Анна Стратан (57 кг) мен Ұлдана Тілеухан (68 кг) алтын медаль жеңіп алып, тағы 5 қола жүлдемен Қазақстан құрамасы командалық есепте екінші орынға ие болды.
Осылайша, Анталия төріндегі додада қазақстандық жас балуандар әр жас санатында жоғары нәтиже көрсетіп, ел қоржынына 12 алтын медаль салды.
About the Author
