2000 жылдары «Жас Алаш» газетінің абыройы асқақтап тұрды ғой. Әр апта сайын алыс ауылға газеттің келуін асыға күтетінбіз. Сондай жылы нөмірлердің бірінде Ольга Шишигинаның Сидней Олимпиадасындағы жеңісі туралы жазылды. Желаяқтың үлкен көлемдегі суретін жариялап: «Алтының құтты болсын, алтыным» деп тақырып қойған екен. Арада 26 жыл өтсе де, газеттің сол беті әлі көз алдымда тұр және тақырыптағы тіркесті мен спорттағы сіңлім, ел мақтанышы Софья Берульцеваға жиі айтамын. Өйткені, Софаның жүрген жері – жеңіс, басқан ізі — алтын.
Жапониядағы жазғы Азия ойындары Қазақстан үшін абыроймен басталды. Құрлық көз тіккен турнир басталған бетте-ақ алтынның сыңғыры естіліп, Рината Сұлтанова, Алексей Луценколар көш бастады. Велоспорттағы дәстүрді каратэшілер жалғап, Жоламан Биғабыл мен Софья Берульцева ел әнұранын екі рет шырқатты. Оралдық Жоламан үшін бұл алғашқы Азиада болса, каратэнің жілігін шаққан Софа үшін екінші Азия ойындары еді. Қайсар қыз екі ойында да жанкүйерін жерге қаратқан жоқ. Финалға дейін ең мықтылармен кезігіп, ақтық сындағы қарсыласына бір ұпай да ұстатпады.
«Алтын алғандағы сезім ғажап қой… Бәрі ойдағыдай өтіп, Азия ойындарында екінші рет топ жарғаныма қуаныштымын. Жеребе тасталған соң, оңай болмайтынын білдім. Себебі, кіл мықтылар менімен бір топқа түскен екен. Мәселен, жартылай финалда кездескен непалдық спортшымен Ханчжоудағы Азиаданың финалында кездескенбіз. Биылғы Премьер-лига кезеңдерінің ақтық айқасында екі рет жолықтық. Алдыңғы Азия ойындарымен салыстырғанда, ол кәсіби тұрғыдан қатты өскен. Сондықтан, биылғы текетірестің тартысты өтуі де заңды. Шешуші ұпайды соңғы секундтарда жұлып алғанымды көрдіңіздер. Алғашқы жекпе-жек те оңай болған жоқ, 9:6 есебімен жеңдім. Спортта атақ-абыройың артқан сайын қарсыластар да тісін қайрай бастайды ғой. Осы Азия ойындарында барлығы маған дайындалып келгендей әсер қалды», — дейді Берульцева.
Алғашқы айналымдар тартысқа толы болғанымен, ақтық жекпе-жек Софаға еш қиындық тудырмады. Финалда тәжірибелі Берульцева Таиланд спортшысын ірі есеппен жеңіп, Азия ойындарының чемпионы атанды.
«Финалға жетсем, алтын алатыныма 100 пайыз сендім. Өйткені, келесі топта айтарлықтай мықты қыздар болмаған еді. Каратэ Олимпиада ойындарының бағдарламасына енбегендіктен, біз үшін Азиада басты жарыс саналады. Азия ойындары тұтас еліміз үшін маңызды дода. Сондықтан, аянып қалмадық, бар күшімізді салдық. Ауа райына бейімделу үшін Жапонияның Юки қаласына алдын ала барып, жаттығуға кірістік. Негізі, жыл басында алдыма екі мақсат қойған едім. Бірі – Grand Winner атағын жеңіп алу. Екіншісі – Азия ойындарының алтынын алу. Екі мақсатым да орындалды, сол үшін қуаныштымын», — дейді Софья.
Жапониядағы Азия ойындары каратэден Қазақстан құрамасы үшін табысты аяқталды. Отандық каратэшілер құрлықтың мультиспорттық жарысынан 2 алтын, 1 күміс және 2 қола медаль жеңіп алды. Сондай-ақ, жалпыкомандалық есепте екінші орынға тұрақтады. Бұл жетістіктің артында тынымсыз еңбек, төгілген тер және бапкерлердің өлшеусіз үлесі жатыр.
Ал Софья Берульцева қазіргі Қазақстан спортындағы жарқын тұлғалардың біріне айналды. Шымкенттік атлет 25 жасында Олимпиаданың қола жүлдегері, Азия ойындарының екі дүркін чемпионы және әлем біріншілігінің күміс жүлдегері саналады.
About the Author
